Россия Сәламәтлек саклау министрлыгы әлеге өч препаратны предмет-сан исәбенә керткән.

Яңа кагыйдәләр буенча, исемлеккә эпилепсиягә каршы кулланыла торган Габапентин, мускул тонусын киметүче Баклофен һәм авыртуны басучы Дицикловерин+Парацетамол кертелгән. Бу дарулар хәзер махсус контроль белән генә сатылачак.

Белгечләр фикеренчә, мондый чаралар даруларны контрольсез куллануны киметү өчен кертелә.

Шул ук вакытта, Россиядә дару әйләнешенә бәйле башка яңалыклар да бар. Мәсәлән, 1 марттан срогы чыккан яки махсус системаларда теркәлмәгән препаратларны сату тулысынча тыелды. Мондый даруларга «Гадел билге» маркировкасы булмау яки мәгълүматның дөрес булмавы да сәбәп була ала.

Моннан тыш, РФ Федераль монополиягә каршы хезмәте апрель аенда яшәү өчен мөһим булган берничә даруга бәяләрне төшерү турында карар кабул итте.

Яңа кагыйдәләр пациентлар өчен дә, даруханәләр өчен дә җаваплылыкны арттыра — хәзер дару сатып алганда документлар һәм рецептлар аеруча мөһим роль уйный.

Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.