Татарстанда «Безнең ишегалды» программасы кысаларында быелгы төзекләндерү эшләре ахырына якынлаша. Бүгенгә планлаштырылган эшләрнең 94 проценты үтәлгән.

Бу хакта республика Хөкүмәте йортында узган киңәшмәдә Татарстан шәһәрләрен үстерү институты фонды директоры урынбасары Арина Петрова хәбәр итте. Киңәшмәне Татарстан Рәисе Рөстәм Миңнеханов үткәрде.

Юл эшләре 560 ишегалдында башкарыла. Аларның 496сында эшләр тулысынча төгәлләнгән, 64ендә дәвам итә. 19 августка юл эшләренең үтәлеше 98 процент тәшкил иткән.

Тышкы яктырту системаларын урнаштыру да 98 процентка башкарылган. 517 ишегалдында эшләр тәмамланган, 41ендә әле дәвам итә. Яктыртуны 30 августка кадәр төгәлләү планлаштырыла.

Җиһазлар урнаштыру эшләре 86 процентка башкарылган. Барлыгы 11 мең берәмлек җиһаз куелган. 370 ишегалдында монтаж эшләре тулысынча тәмамланган, 95 ишегалдында эшләр дәвам итә.

Агымдагы атнада Казан, Әлмәт һәм Чистай районнарында программа кысаларындагы эшләрнең сыйфатына мониторинг үткәрелгән. Тикшерү барышында җитди кимчелекләр ачыкланмаган.

Шул ук вакытта кайбер ишегалларында эшләрне 30 августка кадәр төгәлләп бетереп булмаячак. Бу җылылык челтәрләрен алыштыру кебек башка подряд оешмалары башкара торган эшләрнең тәмамланмавы белән бәйле.